|
ҚЫЗЫЛОРДА. Қыркүйектің 25-і. ҚазАқпарат /Жаңагүл Сердалы/ -Үстіміздегі жылдың 7 айы ішінде «Батыс Еуропа-Батыс Қытай» халықаралық дәлізінің Қызылорда облысы аумағындағы құрылысында еңбек етіп жатқан мердігерлік ұйымдардан бюджетке 249,2 млн. теңге көлемінде салық қаржысы түсті. Оның ішінде облыстық бюджеттің үлесі 135,4 млн. теңге болды. Қазіргі таңда облыс территориясын басып өтетін бұл алып құрылыс алаңында барлығы 15448 адам еңбек етіп жатыр. Жұмысшылардың орташа жалақысы 87 000 теңгені құрайды. Жол құрылысы сонымен бірге өңірде жаңа жұмыс орындарының ашылуы мен орта және шағын кәсіпкерліктің қанат жаюына серпін берді. Мұнда жұмысшылардың ай сайынғы ас-ауқаты үшін 11 тонна ет, 48 тонна ұн, 17 тонна сүт, 60 тонна картоп пайдаланылып келеді. Оларды жергілікті кәсіпкерлер даындап беруде.
|
