- Бұл жоба біз үшін, ең алдымен, жастардың интелектуалдық әлеуетіне инвестиция салу, орта білім беруді дамыту, әлемнің ең үздік университеттерінде білім алуға дайындау тұрғысынан маңызды, - деп атап айтты аймақ басшысы.
Ол сондай-ақ ел Президенті Нұрсұлтан Әбішұлы Назарбаевтың дарынды балаларға, интеллектуалдық элитаны қалыптастыруға зор көңіл аударып келе жатқандығын айтып өтті. Мемлекет басшысының бастамасымен Қазақстанда талантты балаларды оқытудың бірегей жүйесі құрылды. Атап айтқанда, Қарағанды облысында 7 мамандандырылған мектеп, 40-тан аса гимназиялар мен лицейлер жұмыс істейді. Олар жоғары деңгейдегі оқыту жүесін өз тәжірибесінде кеңінен пайдаланып келеді. Қазақстанда «Назарбаев зияткерлік мектептері» желісі құрылу үстінде. Биылғы жылдың қазан айында осындай бір мектептің құрылысы Қарағандыда аяқталатын болады.
Бұл бағыттағы атқарылып жатқан жұмыстар өз нәтижесін де көп күттірген жоқ. Ағымдағы жылы халықаралық пәндік олимпиадалар мен жарыстарда облыс оқушылары 50 медальды олжалады. Республикалық деңгейдегі жалпы білім беру пәндері бойынша облыстық олимпиадалық команда мен ғылыми жобалар командасы биылғы жылдың ең үздік командалары деген атқа ие болды. Назарбаев Университетінде қарағандылық 136 шәкірт білім алуда.
- IB жобасын енгізу бойынша біздің ынтымақтастығымыз жемісті боларына сенімдімін. Бұл өңіріміздің білім беру мекемелеріне жаңа формациядағы мұғалімдер даярлауға, ұстаздар мен оқушылар арасында нағыз көшбасшы тұлғалар тәрбиелеп шығаруға мүмкіндік берері сөзсіз, - деді Әбілғазы Құсайынов кездесу соңында.
Облыс әкімінің баспасөз қызметі
