17-Сәуір-2013 - Облыс әкімі Бұқар жырау ауданына жұмыс сапарымен барды
Өңірдің әлеуметтік-экономикалық даму деңгейімен жете танысу, өндірістік және әлеуметтік нысандарды аралау, тұрғындармен кездесіп, өзекті мәселелердің оң шешімін табуына ықпал жасау – міне, облыс әкімі Бауыржан Әбдішевтің биылғы жылдың 17 сәуірінде Бұқар жырау ауданына барғандағы жұмыс сапарының негізгі мақсаты осылар болатын.
Облыс басшысы «Қазақмыс» Корпорациясы» ЖШС-нің Нұрқазған кен байыту комбинатында болып, онда өндірістік көрсеткіштермен, кәсіпорын жұмысшыларының еңбек жағдайларымен танысып, «Нұрқазған» кенішінің шахтысына түсті.
Жұмыс сапары Көкпекті кентінде (Солонички станциясы) жалғасты. Облыс әкімі кенттегі орта мектептің материалдық-техникалық базасымен танысып, Қарағанды қ. әкімдігіне аталған мектепті облыс орталығының ведомстволық және аумақтық бағыныстылығына өткізу бойынша жұмыс жүргізуді, станцияға келетін 9 шақырым жолды жөндеуді жүктеді. Сондай-ақ Бұқар жырау аудандық әкімдігіне кент жолдарына қиыршық тас төсеп, тегістеу жөнінде тапсырма берді.
Сонымен қатар ауыл тұрғындары мен Бұқар жырау аудандық әкімдігіне кездесу барысында мектеп жасына дейінгі балаларға арнап шағын орталық пен клуб құру мәселесін қолға алуды ұсынды. Ал, мектеп оқушыларына Қарағандының Октябрь ауданындағы жақын орналасқан мектептерден барып оқуы үшін автобус қатынасын ұйымдастыруды тапсырды.
Өңір басшысы Көкпекті кентін Қарағанды құрамына енгізген соң халықты ауыз сумен қамтамасыз ету, көшелерді жарықтандыру, мал жайылымын бөлу сынды өзекті мәселелердің қалалық бюджет есебінен оң шешімін табатындығын атап өтті.
Сондай-ақ Қушоқы көмір разрезінде болып, оның жұмысымен жан-жақты танысып шықты.
Осыдан кейін облыс әкімі Петровка ауылының тұрғындарымен кездесіп, ауылда су құбырын тарту және клуб ұйымдастыру, мал жайылымы сынды мәселелер талқыланды.
Әрбір көтерілген көкейкесті мәселе бойынша аймақ басшысы аудан әкімі мен тиісті құрылым басшыларына нақты тапсырмалар берді.
- Мен аудандарыңызға сіздермен кездесіп, өңірдің өзекті мәселелерін өз ауыздарыңыздан есту үшін арнайы келдім. Көтеріп отырған сұрақтарыңыздың бәрі орынды және олар біртіндеп, кезең-кезеңімен шешімін табатын болады, - деп Бауыржан Әбдішев кездесуді түйіндеді.
.jpg)
Облыс басшысы «Қазақмыс» Корпорациясы» ЖШС-нің Нұрқазған кен байыту комбинатында болып, онда өндірістік көрсеткіштермен, кәсіпорын жұмысшыларының еңбек жағдайларымен танысып, «Нұрқазған» кенішінің шахтысына түсті.